تداولت مواقع إعلامية تونسية، نصا خطت كلماته بأنامل والدة سيف الدين اليعقوبي، البالغ من العمر 24 سنة، ومُنفذ مجزرة سوسة.
وكتبت والدته، نصا طويلا، ختمته بنصيحة هي: « ولدك ينجم يكون إرهابي، بلّغ عليه قبل مايفوت الفوت »..
إليكم النص ..
« سيف حدّو حد روحو… ذبانة ما يقتلهاش… ما يحبش العرك… خمس سنين لتالي ولى مصلي وملتزم…
ساعات يعمل لحية، وساعات ينحيها… وساعات يلبس قميص… وساعات لا. خذا الباك على مرتين، فرحنالو… مشى للجامعة… مازال ماخذاش شهادتو آما يقرى على روحو…
عمري ماكنت نتصور… عمري…
توة أكثر من ستة شهور ولى يغيب برشة…
يسكر التليفون ويقعد بالثلاثة وأربعة يام ما يحكيش معانا… مستانس يكلمني كل يوم…
في الشتا قال باش يبطل القراية… قعد شهر ماعندناش عليه خبر…(الأكيد وقتها مشى يدرب على السلاح)
[related_posts]
من بعد رجع يقرا نرمال…
الحقيقة دخلني الشك مرة وحدة…
كي صار ما صار في متحف باردو …قاللي!!! يستاهلو… قتلو علاش قاللي كفار… وقفت غادي… مازدناش حكينا…
ياليتني تصرفت، عملت حاجة…
كي رجعلونا الجثة باش ندفنوها… الناس ما خلوناش ندخلو الجبانة…
ڨعدنا سوايع مطيشين في الشمس
وفي اللخر دفناه البرة مالجبانة،
وما قرى عليه حد…
ولدي وفى حياتو مجرم ومات كالكافر!!!
اليوم ماعنديش وجه نقابل بيه العباد…
نستنى فالنهار اللي نموت فيه… نحب نموت اليوم قبل غدوة…
خاللي ربي يحاسبني كيفاش خليت ولدي يوصل للي وصللو… حتى الصلاة ماعادش ننجم نصلي… نحشم من روحي… نحب نموت… »
نصيحة:
——–
ولدك ينجم يكون إرهابي
بلّغ عليه قبل مايفوت الفوت ».
